東華三院愛心天使共賀廣華百歲誕辰宣傳聲
成立於一九一一年的廣華醫院，與香港一起成長，見證過去一個世紀的每個故事。為慶祝廣華醫院的百周年誕辰，東華三院屬下十三間小學特別委派其學生參與錄製共十三段以廣華醫院一百周年為主題的宣傳聲帶，於香港商業一台播放。各錄音收錄如下，歡迎收聽：
1. 廣華醫院的名稱由來
大家知唔知道廣華醫院嘅「廣華」係點解吖? 原來，佢嘅意思係要做一間「為廣東華人治病嘅醫院」。喺一百年前，九龍同埋新界都無醫院架，如果市民病咗就真係好慘! 所以，政府就聯同東華醫院嘅總理同埋地區領袖，一齊發起興建「廣華醫院」。廣華醫院係喺1911年成立，連同1870年成立嘅東華醫院、同埋喺1929年成立嘅東華東院，後嚟就統稱「東華三院」嘞!
我係東華三院姚達之紀念小學嘅梁詠恩同學，我祝廣華醫院100歲生日快樂!
2. 廣華醫院為何建於油麻地
今年我哋慶祝辛亥革命一百周年，其實，廣華醫院都有一百歲，佢仲係喺辛亥革命發起嘅前一日，即係10月9日落成嘅，係第一間為九龍同埋新界嘅居民興建嘅醫院。廣華醫院位處嘅油麻地，原來叫做「官涌」，係一百年前九龍發展最繁盛嘅地方。根據一本廣華醫院1917年出入院總冊嘅資料顯示，當時有唔少住喺遠至荃灣、大埔嘅居民都嚟到廣華醫院醫病，咁你話廣華醫院係咪幫咗好多人呢!
我係東華三院李賜豪小學嘅潘嘉寶同學，我都係喺廣華醫院出世架!
3. 廣華醫院始創時已中西醫兼備
你哋估唔估到，喺一百年前廣華醫院創院嘅時候，佢係一間中醫院定係西醫院呢? 兩個答案都啱! 廣華醫院一開始已經中西醫兼備架嘞，早期嘅華人唔習慣睇西醫，所以政府透過廣華醫院大力推動西醫，到咗1960年代廣華醫院重建完成，佢已經成為一間具規模嘅西醫院嘞。今年廣華醫院將會大力推展中西醫住院病人服務，俾更多病人受惠。
我係東華三院羅裕積小學嘅莊德蓉同學，我祝廣華醫院100歲生日快樂!
4. 廣華醫院何時開始施贈門診中藥
廣華醫院喺創院嘅時候已經有免費醫療服務。由於中藥材價格比較貴，所以最初唔能夠負擔喺門診施贈中藥。喺1922年，發生咗一件好人好事。當時有一位自稱無名氏嘅小婦人，佢前後四次捐贈合共50,580元，要求廣華辦理埋施贈中藥。此後，廣華醫院就加設基金，開始施贈中藥。究竟50,580元即係幾多錢? 原來當時嘅一幢新樓亦只不過係數千元架喳。
我係東華三院高可寧紀念小學嘅黃爾彥同學，我都係喺廣華醫院出世架!
5. 廣華醫院何時開始施贈門診中藥
廣華醫院喺創院嘅時候已經有免費醫療服務。由於中藥材價格比較貴，所以最初唔能夠負擔喺門診施贈中藥。喺1922年，發生咗一件好人好事。當時有一位自稱無名氏嘅小婦人，佢前後四次捐贈合共50,580元，要求廣華辦理埋施贈中藥。此後，廣華醫院就加設基金，開始施贈中藥。究竟50,580元即係幾多錢? 原來當時嘅一幢新樓亦只不過係數千元架喳。
我係東華三院高可寧紀念小學嘅黃爾彥同學，我都係喺廣華醫院出世架!
6. 每八個新生嬰孩便有一個是廣華醫院出生
廣華醫院創院初期已撥出一間病房作為產房，採用的是舊式接生方法。到咗1915年，廣華醫院開始聘請助產士提供西法接生。廣華醫院產房嘅出產量真係好驚人架：由1946年政府有出生註冊紀錄開始計，全港出生人口差唔多有4,860,000，而同期廣華醫院就佔咗620,000個BB，即係話，香港平均每8個BB就有1個喺廣華醫院出生架嘞。
我係東華三院冼次雲小學嘅余荔敏同學，我都係喺廣華醫院出世架!
7. 廣華醫院的急症室有多忙碌
你知唔知道廣華醫院嘅急症室有幾忙碌呢？廣華每年總共有十五萬人次求診，即係平均一日要處理410個求診個案! 由於廣華醫院位於全港最繁忙嘅地區之一，佢嘅急症室經常要身肩重任，處理重大突發事件，好似上世紀九十年代嘅無味神探槍擊案、尖沙咀加利大廈大火；喺2003年廣華更加接收全港第一個沙士病人，成功避免沙士病毒喺醫院散播。
我係東華三院港九電器商聯會小學嘅詹若楠同學，我都係喺廣華醫院出世架!
8. 廣華醫院設全港第一個婦女健康普查部
廣華醫院喺1990年已經成立咗全港第一間婦女健康普查服務中心，中心最近公佈咗服務數字，女士喺50歲後由於更年期荷爾蒙減少，每3個就有1個患有骨質疏鬆症，而50歲後嘅男士亦會每10個有1個患有骨質疏鬆症。咁，點先至可以改善骨質密度呢? 原來，我哋小朋友開始就應該多做運動，仲要食多啲高鈣食物，第日年紀大就唔駛驚嘞!
我係東華三院黃士心小學嘅陳穎琳同學，我祝廣華醫院100歲生日快樂!
9. 廣華醫院有多少個門診部
廣華醫院係一間全科醫院，一直為市民提供中西醫療服務。廣華醫院總共有四個門診部，分別係西醫嘅全科門診、專科門診；以及係中醫嘅普通科門診、同埋專科門診。廣華成立一百年嚟，都秉承東華三院嘅傳統，為市民提供免費醫療服務，單單係上個年度，已經有超過七十一萬人次接受廣華提供嘅免費中西醫療服務。
我係東華三院王余家潔紀念小學嘅趙偉然同學，我都係喺廣華醫院出世架!
10. 廣華醫院的全球最先進320排動態容積電腦斷層掃描儀
你哋知唔知道東華三院喺廣華醫院設置咗一部全球最先進型號嘅電腦掃描儀?呢部儀器可以掃描到人體裡面各個器官嘅健康狀況，好似照心臟咁，只需要0.35秒 ，而且需要用嘅顯影劑同埋輻射劑量特別少，掃描一次心臟產生嘅輻射量，就只有兩毫希，低過一個人喺香港住一年吸收嘅幅射量。所謂「預防勝於治療」，早啲知道身體有咩野問題，就可以及早治療啦!
我係東華三院李東海小學嘅吳海盈同學，我都係喺廣華醫院出世架!
11. 廣華醫院有個「未病先醫理」的上醫館
有病梗係要睇醫生，無病都要睇醫生? 「治未病」觀念就係着重預防保健養生之道嘞。廣華醫院裡面嘅「東華三院王澤森上醫館」以「治未病」為概念，首先為求診者作體質辨識，再按佢地唔同體質同症狀分流到唔同嘅專科門診，務求做到唔生病、少生病、遲生病，生活質素自然更好啦。
我係東華三院周演森小學嘅潘嘉祺同學，我祝廣華醫院100歲生日快樂!
12. 東華三院文物館—–從前的候診大堂 今天的法定古蹟
你有無留意到廣華醫院裡面有一座好似廟宇咁樣嘅建築物呢? 呢座建築物，原來係一百年前嘅候診大堂，佢喺1970年活化成為「東華三院文物館」，仲喺2010年被列為香港法定古蹟添。文物館揉合咗中西建築，例如紅磚綠瓦、門前嘅千步廊等都展現咗中國傳統建築特色；而拱門、拱窗、閣樓嘅設計又係20世紀初流行嘅西式建築特色。大家有時間記得嚟東華三院文物館參觀吓!
我係東華三院鶴山學校嘅劉君政同學，我祝廣華醫院100歲生日快樂!
13. 全面的中西醫住院病人服務，只此一家
香港嘅醫院向嚟只有西醫入病房，但係廣華醫院，將喺今年有一隊由中西醫醫護人員組成嘅專業團隊，將「中西醫住院病人服務」推展到五個專科，包括內科、外科、婦科、骨科同埋兒科，為病人提供更好嘅服務。中醫師除咗會巡房，仲會同西醫一齊跟進住院病人嘅「排板」同埋出院後嘅覆診。咁全面嘅中西醫住院病人服務，全港只此一間架!
我係東華三院馬錦燦紀念小學嘅曾建晴同學，我祝廣華醫院100歲生日快樂!